الشاعر عزنا ود اب سن- 1- سلام يا الجاهلة

الشاعر عزنا – 1- سلام يا الجاهلة

 هذه المجادعة قام بسرقتها ود نصيري من منتديات جبل اولياء وبالرغم من ان مجلة

النافذة قد نبهت ادارة موقع جبل اولياء، فلايزال المسروق بواسطة ود نصيري في http://www.jabalawlia.com/vb/showthread.php?t=121&page=3

صفحات منتدى جبل اولياء.

عزنا أحد أعمدة منتدى النافذة وإدارتها ، وإضافة إلى ذلك فهو شاعر سليل اسرة شاعرة معروفة بتاريخها العريق ، وهو في هذا البوست يخلد لحظات معينة التقى فيها بعض أعضاء النافذة على فنجان قهوة ، فانظر كيف كانت ردة فعله شعرا ، وانظر أيضا كيف كانت التعقيبات والردود من بقية الهمباتة الذين حضروا الجلسة أو أولئك الذين لم يحضروها وتعجب من هذا الإبداع الذي يجري في سهل ممتنع

———-

سلام..يا الجاهلة

——————————————————————————–

سلام..يا بقة العسل الشِرِق مصّاصِك
سلام..يا ظبية الوادي الكُتار قُنَّاصِك
سلام..شاوياني نارك وطول نهاري بساسك
سلام..هاريني ريدك وفي القلب رصاصك
******
سلام الجاهلة يا جيلاني زادو شقايا
سلام..ريلاً مَهَقَّتْ جوز خدودو مرايا
سلام..ست اللهيج نارك شَوَتْ أعضايا
سلام..ديسك ضلام الليل والعيون ضوايا
******
سلام الجاهلة يا جيلاني..مِي غالاتة
سلام..يا برطم العسل اللذيذ ..شوكلاتة
سلام..الجاهلة يا خلاّني زايدة غلاتة
تتلاصف خدودها وبرضو زايدة حلاتة

——–

لعله كان من الأفضل أن نقدم تمهيداً لـ ( سلام..يا الجاهلة ) قبل تقديم السلام شعراً ..في جلسة عصرية اجتمع نفر من الهمباتة عند الجاهلة لشراب القهوة وحقيقة الجاهلة مِي جاهلة نصاح ودعونا نطلق عليها اسم (سلام)..شاءت الأقدار أن يتم ايصال خبر القهوة لكل من الهمباتي محمد إبراهيم محمد على والهمباتي البشرى إبراهيم محمد على وهما أخوان شقيقان من أشعر شعراء الشكرية الشباب – قبل عدة أيام سجل تلفزيون السودان في حلقة شوارد لقاءاً ضم البشرى إبراهيم والأستاذ المحامى كرار صديق والهمباتي ميرغني عبدالله – وقد جاءنا الرد الأول من محمد إبراهيم محمد على وكان مفاده الآتى:

سـلام يـا ملكـة وسكونـك أديــس
سلام ظبية جبال كَرَنْ الكَسَاها الدِّيْـسْ
كان ما خفت مـن الله ولعنـت ابليـس
تكوني الراهبة يَمْ وجنات وأكون قِدِّيِسْ
******
بالسين:سيـدة الستـات مِتِـل امريكـا
باللام:لونها زي تبري ومِسِنُّوْ سَبِيْكَـة
بالألف:أشـا داييـب سبـغ ليكـا (1)
بالميم:مالكة لقلوبنا ومِسَاهِـن شِيْكَـة
******
قول لأبْسِنْ جَمَالاً شُفْتُو فـي الحبشيـة
فزَّزْ نُومِي من عَيْنَيْ صَبَـاحْ وعَشِيَّـة
حلوة أديبة راقية وِحَيْشَة بِتْ وَحَشِيَّـة
سَاطَتْ عَقْلِى بي مُسْوَاطْ كِتِرْ هَبَشِيَّة (2)

(1) التحية بلغات (هندي -لهجة البجة -ارتري)
(2) اصبح مجنون ويكثر الهبش

ونحن الآن في انتظار رد الهمباتي الكبير البشرى ابراهيم محمد على..ويا همباتة جهزوا ردودكم ..الناس ديل عبهم مليان خلااااااااااااااااااااااااااااس

———-

ويرد عليه جيلاني بهذا المربع

سلام القاصده يا عزنا مهيريه!!؟
العرضت جمال سارقاه من وطنيه
والقالت مهيره صديقته الشايقيـه
خفة دم وزوق جلسات وطيبة نيه

——-

أما شوقي فيقول :

سلام يا ملكة الدار البقت محمية
سلام يا الشبهوك ظلما علي الحورية
شن اوصف واقول دعجك كهارب اللية
رمشك في القلب بغرز سهامو المية
*****
خدك ما الحرير انعم واظنو شوية
من التبري شال لونو وشرب حنية
فرة ثقرك البرق الشلع في الصية
جيدك ما الغزال كفلك بديع يا بنية
*****
ديسك هردبيس الليل قبل دغشية
كتفك لي الشعر فرش الضماير حية
ممشوقة قوام ماكي الطويلة النية
ما اتشابيتي يوم ايدك تندّي ترية
******
سلام يا الساكنة في البلد البقت محمية
سلام يا عزة ليك يا الشلتي ضي عينيا
شن فايدة قليب انشال بلا جودية
هاك الروح كمان والله برضو هدية

——–

ورغم سفره المتواصل يجد الشاعر الهباني قليل وقت ليبث هذا المربع :

سلام ليكم جميع والخاص يجيك يا سلام
سـلام ظبيـة أديـس الفاقـت الارام
سلام يـا الفُقتـى اقرانـك ورا وقـدام
سلام يا ملكة الحبش السكونـه بًشـام
****
سلام يا الفيكى غنو فطاحلة الشكريـه
سلام يا اللى غًناكى خرتى بى الزنديه
سلام يا البِضوى ألماظك جهر عينيـه
تسلمى يابدور اومـاك ونجـم أبريـه

****
لكم تحياتى وهذا العربون فأنا فى تسفار
ومشاغل دنيا لكنى سأعود بازن الله

———-

ويتداخل واحشني بهذه الأبيات

تتراقص القوافي طربا وتعزف المشاعر نغما
فيناسب بوح هذا الإحساس ليرسم لنا ملامحه
في لوحة مطرزة برقة وروعة الإبداع
بأسلوب جميل ساحر وكلمات عذبة
احبائ عزنا – وطنية – جيلاني -شوقي – هباني
انحناءة خاصة لكم تختصر كل المسافات التي بيني وبينكم
وبعدها اسمحوا لي بالرحيل
فلم يعد قلمي قادراً على المكوث هنا طويلا
خوفاً من أن يخدش اشراقة هذه الحروف
والكعادة أنتظر بلهفة المزيد من إبداعات بوحكم العذب

———–

ويعود جيلاني مرة أخرى في رد طويل هذه المرة

دربك ماشـي ويـن واحشنـي فوقـك ديـه
يا الكاسينا بي الابداع وبي الأخلاق وحسن النيه
نار كورسيـك مسخنـه فـي النوافـذ حيـه
كيف تنساه لو بشار جلالة قدره جاكـه عشيـه

وينـك يـا اب حجـل يـا اب طلتـاً عفويـه
ليـك عشرتنـا هانـت وتبعـتـه رطانـيـه
فـارس دار جعـل مـا فوقـك المحـريـه!!
تنسى منابع التاريخ ودق التور وقصـة ريـه

تنسى المـك نمـر تنسـى السيـوف مسقيـه
اهو عيون ناس سـلام زيـك تجيبـون ميـه
وهاكـم منـي قـول يـا معشـر الشكريـه
والكاينـه التكـون باقـي العمـر عـاريـه

قمت بـراي عصـر قاصـد مـرادي بنيـه
بركـت اب سـدر عـن بابـه فـي القطيـه
جات بالفركـه لافحـه القرمصيـص متنيـه
ذي ورتابـه قامـت مـن قصيبـتـاً نـيـه

دخلنـا الليـل سـوى والريلـه حنـت ليـه
مـا جـادت كتيـر دسـت شعـوره الحيـه
يـا جنـات سـلام عنبـك لـمـس ايـديـه
سهـر الليـل معـاك والله شايـفـه شـويـه

بي شمس الصبـاح هـدر اب سـدر بكريـه
عقلـي الطـار سـلام ملكـة سبـا الحبشيـه
نسيـت القبلـه ويـن وتـلالـك الشرقـيـه
والشـئ العجيـب ايضـا نسيتـه وضـويـه

———-

وإذ تحس دكتورة نهى بأنها مستفزة بابيات من سبقها من الهمباتة تنشد قائلة

سلام يا الكتفتي الرجال بديسك
خليتي الخلق تتراطنبو حالي حديثك
شرارة نارك صابت قليبو جليسك
ما ظنيت طبيب بشفيهو منو حسيسك

******
سلام يا ملكة الريل في خلاهن
سلام ضحكاتك حزن ما غشاهن
نديداتك بي فتنتك فارقاهن
سلام إنت العيوب خلقتي بلاهن

*****
سلام يا ست السماح و مليكتو
إنت القمر دورين -زاتو- ماكي شبيهتو
فارسك ما خبر كيفن يلاقى طريقتو
طول في كبل حسنك ناسيها فريضتو

******

سلام يا البي كاحلات عيونك فتي الأرايل
قافي عجز لي وصف الحسن مو طايل
المولى فوقك ردمو السماح الكايل
قاسي ليمك خلى العين تكب متل السحاب الشايل

============

ويرد عليها جيلاني بقوله

نها يا سلام مـن نمـك الوصـاف
وبالسماعه كشفك لي سلام انصـاف
ورينا يا دكتوره كيف بتعالج الرجاف
لو ايد سنارك من السـلام بتخـاف

———

وترد نهى على جيلاني ايضا بما يلي

يا الجيلاني أخوي الريدة ما بتنهاب
و الريد ما بفرز فقير و أرباب
بي شوفة المحبوب مرضان السنين بنطاب
و سلامو بيرد الروح من دون زعل و عتاب

******
يا الجيلاني الطب حار في أمر الريدة
من فعايل الإنس و ألا ساحرة مريدة؟
القلوب بتريد و العقول بي ابتلاها شريدة
إن صابت سهامها زولها بلزم التشهيدة

*****
الزول البريد ما تسائلو كيفن حالو
حال العشق بين في في عضاه و نحالو
غالبو الموت و بلا المعشوق حياتو ما بتهنا لو
ما بدور عرفة طبيب خبر المجرب فالو

——–

ولا يفوت الشاعر المسدار فرصة ليحي الجاهلة على طريقته الخاصة فيقول

سلام للجاهلة … من المسدار …

——————————————————————————–

سلام للجـــاهلة حين شالت قليبي معاها
سلام أرض الخواجه وكلْ تراب ضماها
شالت مني روحـــــي وباللهيب شاوياها
آه .. من سين مفدَّع ومن لِحاظْ طالْقاها
***
سلام يمتدَّ لي لحْظاً ملك أحشــــــــــــايَ
ســـــــلام يا النايره بسْمة سنِّك الضوَّايا
محروق جوف زمان جيـلاني ليَّ ضرايَ
وفي شـــــــــان عزَّنا دعَّشْتِ ليَّ مسايَ
***
سلام ست الحسان والراء تجيد ترديدها
مكتول بالعيــــون واسرني مقطع جيدها
كلْ ما أقــــول أتوب نيرانها زايده هويده
كيفِن الوصول للســـــــــامية فينا سعيده
****

يا ناس النافذه سلام ليكم جميعاً … وإن شاء الله إتوا طيبين … وأنا بعد رحلة خريفية رائعه للسودان (12) يوم تاني جيتكم صاد من جديد وأحمل معي كل الجمال … ومن دخلت لقيت الهمباته مشوشوين بي جمر الحب … وقلت أخير الزول يخش الملَّال أوَّل حاجه …. وبعدين يشوف الأحوال شنو ….
ليكم تحياتي وجاييكم تاني … وسلامي الحار لي كل أحبابي .. الجميلين والرائعين ..

=============

ويرد عليه جيلاني وبينهما مساجلات مستمرة

يا المسدار رجعت الشارقه ماك متعافـي
سيد الزام وسيد الدرقه والصهاله والعنافي
لو ما الجاهله رحلت بالعفيف والصافـي
ليك فنجانه يا بو جـدري بلسـم شافـي

قال ابوذر (جميله جمال)..غلب اوصافي
ما قادر عليكي شـروط سـلام وِقوافـي
ضامرة هاف وجوز رمان جسيمه الدافي
تعال الحقنا يا اب عرضين وتم المافـي

——–

ويعود الهباني ليرسل هذه الأبيات تعليقا على ما سبق

شقاق تيهة الفنقـه الوسيعـه دروبـه
أسرع فاسِح الباع نجدتـك مطلوبـه
دهب أولاد تبيد البى الغَفر مزروبـه
بدخُل داره وأقعُد جوه فـى الراكوبـه
***
رحيل الجاهله من دار أبجديرى أخونا
هو الخلانـا نتوهـد خـلا وقهبونـه
جلا الخالق الوهب الدلال لى عيونـه
جفلت منو بى الوادى وصِبح مجنونه
***
طبع الريل نفور يا ود عُزاز النـاس
مو غابيكَ يا الحافظ الكتاب لى الناس
أبرُك ناجى ربك وأطبـق الاخـلاص
برجع تانى بى بركة لزيـز الكـاس
***
سوق زكرك وقيم الليل وسـو أورادو
وخل عنك لزيز النوم ووالى سهـادو
سو جُهدك عشان تصرف هناك عدادو
برجع تانى محبوبـك بخلـى عِنـادو

———

وياتي عزنا ليؤكد ملكيته للخيط المرسل وليعطي المزيد من أوصاف هذه الجاهلة التي أثارت قرائح الهمباتة

دقيقة يا همباتة..البوست ده هولي..وهول سلام..

سلام خِلاَّنِي ما بْتَحْمَل كِتَالْ همباتة
سلام في دار اديس المَا وِطِيْنَا بُلاطَة
سلام هَجَرونِي نَاسِي وشَبَّعُونِي غَتَاتَة
سلام غَافْرِكْ سَرَحْ والهَمْبَتُوكِي تَلاتَة
******
يا المسدار سلام ما بتعرف الشَاشَاي
لا وَرَدَتْ حَفِيْر لا سَوَّت البُوْبَايْ
بِتَقْلِى البُنْ مَعَاهُو قِلَيبِي في القَلاّّي
اخير تِنداح وفي لندن تَعَقْدُو الرَايْ
******
في بلد الزهور السمحة حايزة مَكَانَة
تَقْدِل فُوقْ سَمَاحْ همباتة بيك طَربانة
جيلاني ابْ ضراع ألْفَاهَا.. ما تَلْفَانا
شِيْل ليها السَلام وَدِّيهُو مِنِّي أمانة
******
هبَّانِي الكَلَس يا اليَوُتْ سِحابك شَايل
بَرْقَ العِينَة شَالِح ولَى هواك يَحَايِل
هَيَّجْتَ الخُلُوق وفَتَحتَ مَحْضَر وفَايِل
حيَّرتَ القلب.. بِتْ مَرَوِي ولَّه مِهَيرة ولَّه اسمايل؟؟؟

———-

وعندما قرا الهباني أبيات عزنا السابقة رد عليه قائلا
——————————————————————————–
اقتباس
المشاركة الأصلية كتبت بواسطة 3izzna

دقيقة يا همباتة..البوست ده هولي..وهول سلام..

هباني الكلس يا اليوت سحابك شايل
برق العينة شالح ولى هواك يحايل
هيجت الخلوق وفتحت محضر وفايل
حيرت القلب بت مروي وله مهيرة وله اسمايل؟؟؟

سلام همباتى فوق ضهر الوهيط اتحكر
خلف لى ساقو فوق حكريهو خت الدُكر
سلام يا عزنا قبـل الحديـث اتوكـر
سلام جبل الضرا الفى فزعى ما بتتأخر
***
سؤالك لى صَعب بلحيل علـى جوابـو
ودا الشى النسيتو وما حسب لى حسابو
الراقى الجميـل الفـى القلـب نشابـو
طوطو قلبى زى طى الهِدم بى اجنابـو

***
فاهم حاجه يا عزنا
غايتو انا ما فاهم
لو فهمت حاجه فهمنى بالله
الغالى عزنا عجبنى النص الاخير جداً وغايت ما اعجبنى فيه هو اصرارك على التمسك بحقك فى مناجاة الجاهله واسترعاء انتباه المتداخلين بِرِقه معهوده فيك
تسلم يا غالى وبلاش الاسئله الصعبه دى هههههههههههههههههه

———–

وتأتي مهيرة لتصنع من مفردة ( سلام ) مدخلا شعريا

سلام لي عزي انا الدائمـــا علي بفخربو
سلام قدر المكان جـــواي ليــو بحسبــلو
سـلام حسن الخـلق دوما عليــو صاحبلو
سلام فارسا جســـور والله جـــد نحلفبو

********
اريت يا الجاهله لو شوفتي الكلام مسدارك
تسيـــبي القــــهوه تتمني العزيز بجـــــوارك
تفكـــي الخرمـــــه تتبدل جميــــع احوالــــك
وبشحـــد للكريم لـي يــــا سلالالالالم بحالك

=========

ويرد جيلاني على مداخلة عزنا بالتالي
ود اب سن افو .. حقك اكيد مـا ضـاع
بطانه وهيلت ابوك بي الفيها يا بو ضراع
الجاهله هيلتك ومن حقك تـرد الصـاع
لكن ما ذنبه كان مسدار فزع بسـراع!!؟

بعد صبري النفد صليت قريت كـم آيـه
واتبخرته وشربته قـزازه فيهـا محايـه
وكت الجاهله جات اتحلحلـت اعضايـه
قمزت بعيد هنوك وكمان نسيتـه حذايـه

البت البترفـض وديمـه دايـره قرايـه
فنجان قهـوه مـن ايدينـا فيـه شفايـه
حليل جدك زمـان بهديهـا بـت التايـه
دحين خليها لي عمك وارجـى الجايـه

———-

ويعود شوقي هذه المرة ليرد ويعقب على ما ورد في أبيات جيلاني وكأنها بوادر معركة جديدة

المشاركة الأصلية كتبت بواسطة gilany

بعد صبري النفد صليت قريت كم آيه
واتبخرته وشربته قزازه فيها محايـه
وكت الجاهله جات اتحلحلت اعضايه
قمزت بعيد هنوك وكمان نسيته حذايه

البت البترفض وديمه دايـره قرايـه
فنجان قهوه من ايدينـا فيـه شفايـه
حليل جدك زمان بهديها بـت التايـه
دحين خليها لي عمك وارجى الجايه

يا شيخ العرب شيتك اظنو كوايا
شن بتدور كمان باقيلنا زي حاحايا
خلي السمحة هوي شيتك بقالنا حكاية
صبرك ما بفيد ان لكتو حتى جرايه

حقها ترفضك…وما دايرا ليها دعاية
شافعة صغيرة دوب تلعب مع الحراية
كملتا الشباب والشيب وحتى قراية
المتلك يتوب ويموت علي المصلاية

بتدور تدفنا تخليها في المخلايا؟
يا شيخنا اختشي زدتا البلية بلايا
امكن ترضى بي ويهون معاها شقايا
ترقد في النعيم وتغني ليها سمايا

ممشوقة القوام خديها يضووا مرايا
عينيها النجوم تشرق درر ضوايا
ان بسمت صحت فيها البروق صحايا
راسية رزينة حشمة وجامعه مليون اية

Published by

abdalla asad

Foundry expert at United Nations Development Programme Studied Foundry Engineering at technical universit of warsaw Studied Engineering at Sudan University of Science and Technology Went to Khortaqqat secondry school Lives in Canada

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s