الخرطوم 26 مارس 2017 ـ دعت منظمة “هيومن رايتس ووتش” الأميركية، المدافعة عن حقوق الإنسان، في بيان الأحد، السلطات الأردنية إلى “منع دخول” الرئيس السوداني عمر البشير إلى أراضيها أو “توقيفه”. البشير يرتدي عبأة مبادرة العزة والكرامة الأفريقية لدى وصوله الخرطوم ـ السبت 30 يوليو 2016 (صورة من سونا) وأوضحت أن “البشير هارب من المحكمة…

via (هيومن رايتس) تطالب الأردن بمنع دخول البشير أراضيها — سودان تربيون

ريم خليفة الحديث عن العنصرية يقود إلى الحديث عن العبودية في مختلف الحقب على مر التاريخ، وصولا إلى أثر ذلك في ممارسات العصر الحالي. فما كان عبودية أصبح اليوم إتجارا بالبشر، وكلاهما عنصر تجارة، لأن بهما ربحية وتملك أشخاص، فيشترون ويباعون كأي سلعة

via العنصرية.. العبودية.. الإتجار بالبشر — رأي اليوم

نبّه علماء، إلى أن البشرية تواجه خطر الانقراض مستقبلا، في حال لم يجر تدارك الاحتباس الحراري، الذي قد يضعكوكب الأرض في مواجهة سيناريو كارثي. واعتبر العلماء أن الأرض ستشهد سيناريو شبيها بما حصل قبل 250 مليون سنة، حين أدت كارثة ضخمة إلى القضاء على 900 في المئة من الكائنات الحية في الكوكب. وقال باحثون من…

via البشرية تواجه خطر الانقراض مستقبلا .. علماء يكشفون عن “سيناريو كارثي” لنهاية العالم — اخبار السودان من سودان موشن

لندن ـ وكالات: أعلنت وزيرة الداخلية البريطانية، أمبر راد، الأحد، رفضها التشفير التام للرسائل الإلكترونية عبر خدمات مثل “واتساب”. وقالت راد، لهيئة الإذاعة البريطانية “بي بي سي”، إن التشفير التام “غير مقبول على الإطلاق”، وإنه

via مسعود استعمل واتساب قبل تنفيذه هجوم ويستمنستر بدقيقتين — رأي اليوم

الشاعر عزنا ود اب سن- 1- سلام يا الجاهلة

الشاعر عزنا – 1- سلام يا الجاهلة

 هذه المجادعة قام بسرقتها ود نصيري من منتديات جبل اولياء وبالرغم من ان مجلة

النافذة قد نبهت ادارة موقع جبل اولياء، فلايزال المسروق بواسطة ود نصيري في http://www.jabalawlia.com/vb/showthread.php?t=121&page=3

صفحات منتدى جبل اولياء.

عزنا أحد أعمدة منتدى النافذة وإدارتها ، وإضافة إلى ذلك فهو شاعر سليل اسرة شاعرة معروفة بتاريخها العريق ، وهو في هذا البوست يخلد لحظات معينة التقى فيها بعض أعضاء النافذة على فنجان قهوة ، فانظر كيف كانت ردة فعله شعرا ، وانظر أيضا كيف كانت التعقيبات والردود من بقية الهمباتة الذين حضروا الجلسة أو أولئك الذين لم يحضروها وتعجب من هذا الإبداع الذي يجري في سهل ممتنع

———-

سلام..يا الجاهلة

——————————————————————————–

سلام..يا بقة العسل الشِرِق مصّاصِك
سلام..يا ظبية الوادي الكُتار قُنَّاصِك
سلام..شاوياني نارك وطول نهاري بساسك
سلام..هاريني ريدك وفي القلب رصاصك
******
سلام الجاهلة يا جيلاني زادو شقايا
سلام..ريلاً مَهَقَّتْ جوز خدودو مرايا
سلام..ست اللهيج نارك شَوَتْ أعضايا
سلام..ديسك ضلام الليل والعيون ضوايا
******
سلام الجاهلة يا جيلاني..مِي غالاتة
سلام..يا برطم العسل اللذيذ ..شوكلاتة
سلام..الجاهلة يا خلاّني زايدة غلاتة
تتلاصف خدودها وبرضو زايدة حلاتة

——–

لعله كان من الأفضل أن نقدم تمهيداً لـ ( سلام..يا الجاهلة ) قبل تقديم السلام شعراً ..في جلسة عصرية اجتمع نفر من الهمباتة عند الجاهلة لشراب القهوة وحقيقة الجاهلة مِي جاهلة نصاح ودعونا نطلق عليها اسم (سلام)..شاءت الأقدار أن يتم ايصال خبر القهوة لكل من الهمباتي محمد إبراهيم محمد على والهمباتي البشرى إبراهيم محمد على وهما أخوان شقيقان من أشعر شعراء الشكرية الشباب – قبل عدة أيام سجل تلفزيون السودان في حلقة شوارد لقاءاً ضم البشرى إبراهيم والأستاذ المحامى كرار صديق والهمباتي ميرغني عبدالله – وقد جاءنا الرد الأول من محمد إبراهيم محمد على وكان مفاده الآتى:

سـلام يـا ملكـة وسكونـك أديــس
سلام ظبية جبال كَرَنْ الكَسَاها الدِّيْـسْ
كان ما خفت مـن الله ولعنـت ابليـس
تكوني الراهبة يَمْ وجنات وأكون قِدِّيِسْ
******
بالسين:سيـدة الستـات مِتِـل امريكـا
باللام:لونها زي تبري ومِسِنُّوْ سَبِيْكَـة
بالألف:أشـا داييـب سبـغ ليكـا (1)
بالميم:مالكة لقلوبنا ومِسَاهِـن شِيْكَـة
******
قول لأبْسِنْ جَمَالاً شُفْتُو فـي الحبشيـة
فزَّزْ نُومِي من عَيْنَيْ صَبَـاحْ وعَشِيَّـة
حلوة أديبة راقية وِحَيْشَة بِتْ وَحَشِيَّـة
سَاطَتْ عَقْلِى بي مُسْوَاطْ كِتِرْ هَبَشِيَّة (2)

(1) التحية بلغات (هندي -لهجة البجة -ارتري)
(2) اصبح مجنون ويكثر الهبش

ونحن الآن في انتظار رد الهمباتي الكبير البشرى ابراهيم محمد على..ويا همباتة جهزوا ردودكم ..الناس ديل عبهم مليان خلااااااااااااااااااااااااااااس

———-

ويرد عليه جيلاني بهذا المربع

سلام القاصده يا عزنا مهيريه!!؟
العرضت جمال سارقاه من وطنيه
والقالت مهيره صديقته الشايقيـه
خفة دم وزوق جلسات وطيبة نيه

——-

أما شوقي فيقول :

سلام يا ملكة الدار البقت محمية
سلام يا الشبهوك ظلما علي الحورية
شن اوصف واقول دعجك كهارب اللية
رمشك في القلب بغرز سهامو المية
*****
خدك ما الحرير انعم واظنو شوية
من التبري شال لونو وشرب حنية
فرة ثقرك البرق الشلع في الصية
جيدك ما الغزال كفلك بديع يا بنية
*****
ديسك هردبيس الليل قبل دغشية
كتفك لي الشعر فرش الضماير حية
ممشوقة قوام ماكي الطويلة النية
ما اتشابيتي يوم ايدك تندّي ترية
******
سلام يا الساكنة في البلد البقت محمية
سلام يا عزة ليك يا الشلتي ضي عينيا
شن فايدة قليب انشال بلا جودية
هاك الروح كمان والله برضو هدية

——–

ورغم سفره المتواصل يجد الشاعر الهباني قليل وقت ليبث هذا المربع :

سلام ليكم جميع والخاص يجيك يا سلام
سـلام ظبيـة أديـس الفاقـت الارام
سلام يـا الفُقتـى اقرانـك ورا وقـدام
سلام يا ملكة الحبش السكونـه بًشـام
****
سلام يا الفيكى غنو فطاحلة الشكريـه
سلام يا اللى غًناكى خرتى بى الزنديه
سلام يا البِضوى ألماظك جهر عينيـه
تسلمى يابدور اومـاك ونجـم أبريـه

****
لكم تحياتى وهذا العربون فأنا فى تسفار
ومشاغل دنيا لكنى سأعود بازن الله

———-

ويتداخل واحشني بهذه الأبيات

تتراقص القوافي طربا وتعزف المشاعر نغما
فيناسب بوح هذا الإحساس ليرسم لنا ملامحه
في لوحة مطرزة برقة وروعة الإبداع
بأسلوب جميل ساحر وكلمات عذبة
احبائ عزنا – وطنية – جيلاني -شوقي – هباني
انحناءة خاصة لكم تختصر كل المسافات التي بيني وبينكم
وبعدها اسمحوا لي بالرحيل
فلم يعد قلمي قادراً على المكوث هنا طويلا
خوفاً من أن يخدش اشراقة هذه الحروف
والكعادة أنتظر بلهفة المزيد من إبداعات بوحكم العذب

———–

ويعود جيلاني مرة أخرى في رد طويل هذه المرة

دربك ماشـي ويـن واحشنـي فوقـك ديـه
يا الكاسينا بي الابداع وبي الأخلاق وحسن النيه
نار كورسيـك مسخنـه فـي النوافـذ حيـه
كيف تنساه لو بشار جلالة قدره جاكـه عشيـه

وينـك يـا اب حجـل يـا اب طلتـاً عفويـه
ليـك عشرتنـا هانـت وتبعـتـه رطانـيـه
فـارس دار جعـل مـا فوقـك المحـريـه!!
تنسى منابع التاريخ ودق التور وقصـة ريـه

تنسى المـك نمـر تنسـى السيـوف مسقيـه
اهو عيون ناس سـلام زيـك تجيبـون ميـه
وهاكـم منـي قـول يـا معشـر الشكريـه
والكاينـه التكـون باقـي العمـر عـاريـه

قمت بـراي عصـر قاصـد مـرادي بنيـه
بركـت اب سـدر عـن بابـه فـي القطيـه
جات بالفركـه لافحـه القرمصيـص متنيـه
ذي ورتابـه قامـت مـن قصيبـتـاً نـيـه

دخلنـا الليـل سـوى والريلـه حنـت ليـه
مـا جـادت كتيـر دسـت شعـوره الحيـه
يـا جنـات سـلام عنبـك لـمـس ايـديـه
سهـر الليـل معـاك والله شايـفـه شـويـه

بي شمس الصبـاح هـدر اب سـدر بكريـه
عقلـي الطـار سـلام ملكـة سبـا الحبشيـه
نسيـت القبلـه ويـن وتـلالـك الشرقـيـه
والشـئ العجيـب ايضـا نسيتـه وضـويـه

———-

وإذ تحس دكتورة نهى بأنها مستفزة بابيات من سبقها من الهمباتة تنشد قائلة

سلام يا الكتفتي الرجال بديسك
خليتي الخلق تتراطنبو حالي حديثك
شرارة نارك صابت قليبو جليسك
ما ظنيت طبيب بشفيهو منو حسيسك

******
سلام يا ملكة الريل في خلاهن
سلام ضحكاتك حزن ما غشاهن
نديداتك بي فتنتك فارقاهن
سلام إنت العيوب خلقتي بلاهن

*****
سلام يا ست السماح و مليكتو
إنت القمر دورين -زاتو- ماكي شبيهتو
فارسك ما خبر كيفن يلاقى طريقتو
طول في كبل حسنك ناسيها فريضتو

******

سلام يا البي كاحلات عيونك فتي الأرايل
قافي عجز لي وصف الحسن مو طايل
المولى فوقك ردمو السماح الكايل
قاسي ليمك خلى العين تكب متل السحاب الشايل

============

ويرد عليها جيلاني بقوله

نها يا سلام مـن نمـك الوصـاف
وبالسماعه كشفك لي سلام انصـاف
ورينا يا دكتوره كيف بتعالج الرجاف
لو ايد سنارك من السـلام بتخـاف

———

وترد نهى على جيلاني ايضا بما يلي

يا الجيلاني أخوي الريدة ما بتنهاب
و الريد ما بفرز فقير و أرباب
بي شوفة المحبوب مرضان السنين بنطاب
و سلامو بيرد الروح من دون زعل و عتاب

******
يا الجيلاني الطب حار في أمر الريدة
من فعايل الإنس و ألا ساحرة مريدة؟
القلوب بتريد و العقول بي ابتلاها شريدة
إن صابت سهامها زولها بلزم التشهيدة

*****
الزول البريد ما تسائلو كيفن حالو
حال العشق بين في في عضاه و نحالو
غالبو الموت و بلا المعشوق حياتو ما بتهنا لو
ما بدور عرفة طبيب خبر المجرب فالو

——–

ولا يفوت الشاعر المسدار فرصة ليحي الجاهلة على طريقته الخاصة فيقول

سلام للجاهلة … من المسدار …

——————————————————————————–

سلام للجـــاهلة حين شالت قليبي معاها
سلام أرض الخواجه وكلْ تراب ضماها
شالت مني روحـــــي وباللهيب شاوياها
آه .. من سين مفدَّع ومن لِحاظْ طالْقاها
***
سلام يمتدَّ لي لحْظاً ملك أحشــــــــــــايَ
ســـــــلام يا النايره بسْمة سنِّك الضوَّايا
محروق جوف زمان جيـلاني ليَّ ضرايَ
وفي شـــــــــان عزَّنا دعَّشْتِ ليَّ مسايَ
***
سلام ست الحسان والراء تجيد ترديدها
مكتول بالعيــــون واسرني مقطع جيدها
كلْ ما أقــــول أتوب نيرانها زايده هويده
كيفِن الوصول للســـــــــامية فينا سعيده
****

يا ناس النافذه سلام ليكم جميعاً … وإن شاء الله إتوا طيبين … وأنا بعد رحلة خريفية رائعه للسودان (12) يوم تاني جيتكم صاد من جديد وأحمل معي كل الجمال … ومن دخلت لقيت الهمباته مشوشوين بي جمر الحب … وقلت أخير الزول يخش الملَّال أوَّل حاجه …. وبعدين يشوف الأحوال شنو ….
ليكم تحياتي وجاييكم تاني … وسلامي الحار لي كل أحبابي .. الجميلين والرائعين ..

=============

ويرد عليه جيلاني وبينهما مساجلات مستمرة

يا المسدار رجعت الشارقه ماك متعافـي
سيد الزام وسيد الدرقه والصهاله والعنافي
لو ما الجاهله رحلت بالعفيف والصافـي
ليك فنجانه يا بو جـدري بلسـم شافـي

قال ابوذر (جميله جمال)..غلب اوصافي
ما قادر عليكي شـروط سـلام وِقوافـي
ضامرة هاف وجوز رمان جسيمه الدافي
تعال الحقنا يا اب عرضين وتم المافـي

——–

ويعود الهباني ليرسل هذه الأبيات تعليقا على ما سبق

شقاق تيهة الفنقـه الوسيعـه دروبـه
أسرع فاسِح الباع نجدتـك مطلوبـه
دهب أولاد تبيد البى الغَفر مزروبـه
بدخُل داره وأقعُد جوه فـى الراكوبـه
***
رحيل الجاهله من دار أبجديرى أخونا
هو الخلانـا نتوهـد خـلا وقهبونـه
جلا الخالق الوهب الدلال لى عيونـه
جفلت منو بى الوادى وصِبح مجنونه
***
طبع الريل نفور يا ود عُزاز النـاس
مو غابيكَ يا الحافظ الكتاب لى الناس
أبرُك ناجى ربك وأطبـق الاخـلاص
برجع تانى بى بركة لزيـز الكـاس
***
سوق زكرك وقيم الليل وسـو أورادو
وخل عنك لزيز النوم ووالى سهـادو
سو جُهدك عشان تصرف هناك عدادو
برجع تانى محبوبـك بخلـى عِنـادو

———

وياتي عزنا ليؤكد ملكيته للخيط المرسل وليعطي المزيد من أوصاف هذه الجاهلة التي أثارت قرائح الهمباتة

دقيقة يا همباتة..البوست ده هولي..وهول سلام..

سلام خِلاَّنِي ما بْتَحْمَل كِتَالْ همباتة
سلام في دار اديس المَا وِطِيْنَا بُلاطَة
سلام هَجَرونِي نَاسِي وشَبَّعُونِي غَتَاتَة
سلام غَافْرِكْ سَرَحْ والهَمْبَتُوكِي تَلاتَة
******
يا المسدار سلام ما بتعرف الشَاشَاي
لا وَرَدَتْ حَفِيْر لا سَوَّت البُوْبَايْ
بِتَقْلِى البُنْ مَعَاهُو قِلَيبِي في القَلاّّي
اخير تِنداح وفي لندن تَعَقْدُو الرَايْ
******
في بلد الزهور السمحة حايزة مَكَانَة
تَقْدِل فُوقْ سَمَاحْ همباتة بيك طَربانة
جيلاني ابْ ضراع ألْفَاهَا.. ما تَلْفَانا
شِيْل ليها السَلام وَدِّيهُو مِنِّي أمانة
******
هبَّانِي الكَلَس يا اليَوُتْ سِحابك شَايل
بَرْقَ العِينَة شَالِح ولَى هواك يَحَايِل
هَيَّجْتَ الخُلُوق وفَتَحتَ مَحْضَر وفَايِل
حيَّرتَ القلب.. بِتْ مَرَوِي ولَّه مِهَيرة ولَّه اسمايل؟؟؟

———-

وعندما قرا الهباني أبيات عزنا السابقة رد عليه قائلا
——————————————————————————–
اقتباس
المشاركة الأصلية كتبت بواسطة 3izzna

دقيقة يا همباتة..البوست ده هولي..وهول سلام..

هباني الكلس يا اليوت سحابك شايل
برق العينة شالح ولى هواك يحايل
هيجت الخلوق وفتحت محضر وفايل
حيرت القلب بت مروي وله مهيرة وله اسمايل؟؟؟

سلام همباتى فوق ضهر الوهيط اتحكر
خلف لى ساقو فوق حكريهو خت الدُكر
سلام يا عزنا قبـل الحديـث اتوكـر
سلام جبل الضرا الفى فزعى ما بتتأخر
***
سؤالك لى صَعب بلحيل علـى جوابـو
ودا الشى النسيتو وما حسب لى حسابو
الراقى الجميـل الفـى القلـب نشابـو
طوطو قلبى زى طى الهِدم بى اجنابـو

***
فاهم حاجه يا عزنا
غايتو انا ما فاهم
لو فهمت حاجه فهمنى بالله
الغالى عزنا عجبنى النص الاخير جداً وغايت ما اعجبنى فيه هو اصرارك على التمسك بحقك فى مناجاة الجاهله واسترعاء انتباه المتداخلين بِرِقه معهوده فيك
تسلم يا غالى وبلاش الاسئله الصعبه دى هههههههههههههههههه

———–

وتأتي مهيرة لتصنع من مفردة ( سلام ) مدخلا شعريا

سلام لي عزي انا الدائمـــا علي بفخربو
سلام قدر المكان جـــواي ليــو بحسبــلو
سـلام حسن الخـلق دوما عليــو صاحبلو
سلام فارسا جســـور والله جـــد نحلفبو

********
اريت يا الجاهله لو شوفتي الكلام مسدارك
تسيـــبي القــــهوه تتمني العزيز بجـــــوارك
تفكـــي الخرمـــــه تتبدل جميــــع احوالــــك
وبشحـــد للكريم لـي يــــا سلالالالالم بحالك

=========

ويرد جيلاني على مداخلة عزنا بالتالي
ود اب سن افو .. حقك اكيد مـا ضـاع
بطانه وهيلت ابوك بي الفيها يا بو ضراع
الجاهله هيلتك ومن حقك تـرد الصـاع
لكن ما ذنبه كان مسدار فزع بسـراع!!؟

بعد صبري النفد صليت قريت كـم آيـه
واتبخرته وشربته قـزازه فيهـا محايـه
وكت الجاهله جات اتحلحلـت اعضايـه
قمزت بعيد هنوك وكمان نسيتـه حذايـه

البت البترفـض وديمـه دايـره قرايـه
فنجان قهـوه مـن ايدينـا فيـه شفايـه
حليل جدك زمـان بهديهـا بـت التايـه
دحين خليها لي عمك وارجـى الجايـه

———-

ويعود شوقي هذه المرة ليرد ويعقب على ما ورد في أبيات جيلاني وكأنها بوادر معركة جديدة

المشاركة الأصلية كتبت بواسطة gilany

بعد صبري النفد صليت قريت كم آيه
واتبخرته وشربته قزازه فيها محايـه
وكت الجاهله جات اتحلحلت اعضايه
قمزت بعيد هنوك وكمان نسيته حذايه

البت البترفض وديمه دايـره قرايـه
فنجان قهوه من ايدينـا فيـه شفايـه
حليل جدك زمان بهديها بـت التايـه
دحين خليها لي عمك وارجى الجايه

يا شيخ العرب شيتك اظنو كوايا
شن بتدور كمان باقيلنا زي حاحايا
خلي السمحة هوي شيتك بقالنا حكاية
صبرك ما بفيد ان لكتو حتى جرايه

حقها ترفضك…وما دايرا ليها دعاية
شافعة صغيرة دوب تلعب مع الحراية
كملتا الشباب والشيب وحتى قراية
المتلك يتوب ويموت علي المصلاية

بتدور تدفنا تخليها في المخلايا؟
يا شيخنا اختشي زدتا البلية بلايا
امكن ترضى بي ويهون معاها شقايا
ترقد في النعيم وتغني ليها سمايا

ممشوقة القوام خديها يضووا مرايا
عينيها النجوم تشرق درر ضوايا
ان بسمت صحت فيها البروق صحايا
راسية رزينة حشمة وجامعه مليون اية

نسيم النافذة

نسيم النافذة
غاب الشاعر عن النافذة الهباني لفترة طويلة ثم عاد ليكتب هذا الشعر الجميل ، وزاد ذلك جمالا تلك الردود من بقية الهمباتةوالأعضاء

نسيم النافذه

أمس بعد العَصُر أول دخولـى الديـره
شميت لى نسيماً ريحتو فايحه عطيـره
ٌفَتح نخرينى أتشمشم نواحـى فريـره
قاطعنى النسيم طوالـى فتـح السيـره


قال لى كيف وجدت النافذه يا الهبانـى
قُت ليهـو الحمـد لله واجبـه مثانـى
قال لى أولاً حى لـى شيـخ جيلانـى
قوليهو البُعاد مـن نافذتـك أضنانـى


زيد قوليهو أسف من بُعـادو وهجـرو
ومهما طال دماس لابد اطلـع فجـرو
نرجع تانى نقشاهو وربوعـو نعمـرو
ما بننسا الجميل أستاذنا ثابـت قـدرو


قت ليهو الحصل ما كان قصِدنا اتطور
وما قاصدين قليب الجيتنا منو اتعـور
مقسـم باليميـن لـو القلـب بتصـور
كُت وريتـك المحبـوب جواهـو ادور


قال لى العُزر مقبول وحاس بى حالـك
ومتأسف شدييييد لـو الفـراق همالـك
بس شيلو الصُبر والمُستحيـل أنسالـك
طالبين الوكت نرجـع نحلـو عُقالـك


قُت ليهو العُمـر يفداكـه يـا النسـام
أرجع بس وخلى الباقـى لـى الايـام
خلك فى حماى والفى حماى ما انضـام
تهبهب ساهى مبسوط رامى لـى قـدام


قال لى الغرام لى النافـذه فـات الحـد
وهجرى صعيب علي ألامو مـا بتنعـد
أشوف حلو الكلام اغلبنى أكتب الـرد
عيونى يرقرقن بالعَبـره حلقـى انسـد


الفات ننسا يا النسام نعيش لـى باكـر
وما نرجع نلوم نحفظ جراحنـا نزاكـر
نقدل بى الدَبر هازين حُراب ودكاكـر
نلعـن كُلنـا ابليـس اللعيـن الماكـر


أرجع يا نسيم قول لى الحبيب راجينـك
ترجع تانى يـا الكلكـى ولذيـذ جنـك
عهودنا مصونه لا أتبدلنـا لا ناسينـك
وأقريهو السـلام قوليهـو ات كيفنـك


قال لى الحبيب رايق وديع فـى دلالـو
وراجع ديـرة الهبانـى حننـو حالـو
درزن بشاكير جابه مـن حُـر مالـو
باكى طبيعى فاض دماعو بلـل شالـو


وررروك بارت بشاكيرك حبيبنا ان عاد
وقول لى ريم تزرغرتى زولنا قبل صاد
بتنـور ليالينـا وبنـعـدل مُشـهـاد
بترجع تانى صطوتنا الكريـم ان جـاد

========

ويدخل ووررووك معلقا

والله إنت راجل بركة ومتمكن لدرجة تخلع
انا ضحكتة لما دعيت ليك ربنا إزيدك من نعيمو
اها يا الهباني قالو الخوة نصيحة
كان الشي دا حلم قوم علي صوت النباه دا والصلاة خير من النوم
وكمان كان العولمة جابت ليك الرسالة الخاصة
إبقي البشاكير و الشركة و سيدها فداك والله

فيرد عليه الهباني بالأبيات التالية

أمس عصريه يا وروركنا هـب نسيـم
دعاش مطراً جديد مو الانت عارفو قديم
وكت شلع البرق ضو فاطرو طلقة جيم
تيمنى ورجع قال لى متيـن الليـم ؟؟؟


قت ليهو أالنسيم صبحت عجيبه حكايتك
كل مره بتمش تبلغ مرامـك وغايتـك
بتلحظ نور حبيبى وتنقلب فى ساعتـك
تجيب سمح الوصف شايل معاك كتاحتك


قال لى أرجا فرج الما بخيب راجيهـو
وأكتب دُر قصيدك ولى الحبيب أهديهو
مو مغرور ومـو تابـع دلالـو تيهـو
ماخد طبعة التوتـل ضـرب واديهـو


بقيت مُحتار بتين ياخى الهجرنى يعـود
ينزل من عُلاه الغالـى سيـد مسعـود
يعزف حرفو ألحـان الكمـان والعـود
مجرجر وسمو فى واحشنى ليهو شهود


قال لى الصبر برجـع ويغـرد شـادى
بجبر كسرك القرالـو صيـد الـوادى
بعد ما تُهته وأبعرضين رقـد متسـادى
بكره تخُتَ على وتصبح مِقَبِـل غـادى


تصبـح كـل أيامـك فـرح أوسعـاده
وتنظر لى جمال وشو وخديدو السـاده
الممشوق قوامـو وربـو زادو زيـاده
بالزوق والادب حويتـو قُبـب السـاده


النسـام بقـول راجـع بجيبـو معـاى
ما تمِلو انتظار جـدى الخـلا التاتـاى
ما بنقطع وعد لكن قريـب دون جـاى
بتلقا درب ظبيه وأصوات حنين النـاى


فى أمان الله روح وأعمل حسابك ليهـو
أوعـا تلتلـو وكتـر الكـلام خليهـو
قول ليهو العشوق شفتو وعرفت البيهو
فرقك بهدلو وعزالـو شمتـو عليهـو

========================

ويعلق ورووك على الهباني بهذا المربع

فرح الدعاش شايلو النسيـم متمايـل
مرسال الخطاب من هباني لي إسمايل
متين القاهو ردِك وهمي إصبح زايل
لحظة تعود راجين نشوف شن قايل ؟

=========

ويرد عليه الهباني بمربع مماثل

بقول الما قالو قبلى المحلق وقيـس
وبكتب فيهو دُر وأدعو لو رب النيس
كل مناى أخش ألقاهو فيس تو فيس

وأسالو من غرامى يقول بريدك ييس

ويرد ووورررروك ايضا

والله ما بغلبك تقول الكلام الزين
وإشهد ليك حٌكم الدٌوري والتنوين
ونمّك بي لغة الفرنجة رصيـن
لكن يوم تعود بنشوفك تقبل وين؟

=========

ويرد عليه الهباني بمربع

بقبل منو راجع لو الملـك أفكـارى
مافيش غيرو جيهتاً لى تبرد نـارى
علامات الرجوع ظهرت قِبل تزكارى
أم بارح نسيم محبوبى كان فى دارى

===========

أما كرنكا فيشارك بهذه المربعات

يا الهباني خوي كيسك دي أعجب “Case”
إن قالوك مُحال بِتْقول “أحلبـو التيـس”؟؟؟
أنا وإتْ اولاد مَعُوكْ ما بْنَعْـرِفْ التَّحْنِيـس
كدى أسمع رايِ إنا…. يِمكن عليه تقيـس


أول بالتَّبَـادْ….. لازم تـكـون ستـايـل
وتخلي الهمبته المـا ليهـا أصبـح طايـل
الحِجْبَاْت أمْلُصِن وبَدَلَ الخُوسَة شِيل لك فَايل
أبعرضين تَسومو وفي الرقشة ليكـا بَدَايـل


ألبَسْ لك بنطلون وُخَلي الطويـل أب تِكَّـة
واشْري لك قميص ومِن فُوقو خُـتْ جاكتـه
أرمي الحُقَّة تَبْ واملـى الجِيُـوب بالفَكَّـة
وعِنْ جامعة ام درمان أقيف وسِـدَّ السِكـة


وكلُ مَا قِدِرْتَ دُومْ خَلِي الكـلام بريطانـي
وانساهـو النميـم وغيِّـر إسـم “هبانـي”
وإنْ جَاتَكْ فِلانه قول ليها أسمـك “هانـي”
وساكِنْ في الرياض وعنـدي بيتـاً تَانـي


كفاكا ولا أزيد؟؟ أنا عنـدي ليكـا هوايـل
وأسَّعْ رُوقْ وفَكِرْ وانشالله عَرَضََـاً زايـل
الدنيا أم قِـدُودْ مـا حَـالا أصْلَـن مَايـل
ما تْكَشِّرْ وَشِيـكْ.. أرْخِيهـو ثـم “Smile”

============

ويرد الهباني على كرنكا بهذه المربعات

من تبيت أصيل صاحـب فََقِـد بتجابـر
حـلال الشبـك سنـد المُقيـم والعابـر
رأيك ديمه راجح ومستقيـم مـو مشاتـر
لكن الغـزال فـى طبعـو دائمـاً نافـر


توتل ضارب الشبكه وشـرد فـى النـت
فتح ماسنجـرى وقلتـه النلاقـى البـت
بدور القا الحبيب ولـى شمـارى أفـت
يقـول المُلقـم هـى از نــوت فِــت


ما بنعرف نحنس فى الـدواس ياكرنكـا
لكن الغرام غيـر لاعبـو عايـز سكـه
ما بنسيب تراثنـا ومنـو مافيـش فكـا
حارسين الشُقاق وابعرضين يزيم فى الدكه


ات ما ضقتـه خبـاب الركوبـو مهابـه
اجـدع باعـو متفاسـح تقـول هبـابـه
الباجـه الوسيـعـه اللنـقـرن تبـابـه
بضـرع طولـه بجـرد عُملـة السبابـه


كيفن أنسا ديرة الفـى الكُجـر مدسـوس
أمشى أبارى فوق ديرتـاً بناتـه تكـوس
أسيب لبس الرجاله وأسيب لباس الخـوس
واتابع موضة الكفـره اللئـام ونجـوس؟


مـا بنساهـا دام انـك بقيـت تسألـنـى
بى نماً رصيـن سلـب الفكـر بهدلنـى
كيف انسا الفريع البـى الثمـار متحنـى
يا كرنكا اللزوم ضيعـت قـدرك أظنـى

===========

ويعود كرنكا ليرد على الهباني

ردك شافـي حـار لكنـو أدبـك أشْـفـا
وشعرك طَوْع إيديك معناه يعكر ويصفـى
نمك سلسبيل كـان درت سامعـك يشفـى
وكان دار “الكلام” … أهون لو طعن الإشفا


مبضيع قدري عندك ما دامو قدرك عنـدي
يأبسدرأ وسيـع فـاق المحيـط الهنـدي
خبرك عمَّ فات أم جـر ولا عـن شنـدي
جَـرَّحْ كبـدك الفـوَّاح خُمَـرْ باشنـدي


يوم شفتك حزين قُـتَّ انَّلاهِـي مُصابـك
أنَّضحـكْ معـاك يمكـن يِفِـكْ كَـلابَـك
مِتابِـع نمتـك قَسَمـاً أصابنـي الصَّابَـك
يا جبل الثبـات يـوم السيـوف تِتْلابَـك


دي الحاريها فيك يالمَـبْ تفـك تيـلادك
حارساك الفراسة وسمتـة مـن أجـدادك
توب العزة لافحـو مغتـي بيهـو اولادك
الفايل ماهو ليك يب سيفاً غلـب حـدادك


ربـي يخففـو الحمـل العليـك متَّـاقـل
وهمـك ينفـرج وتقبـل هـزار الهـازل
كـان تجردنـي تلقانـي اللـزوم البـاذل
بابا الحكرة ليك وتب ما بَشَمِّـتْ عـازل


يالهباني والله بالغت ….وأنأ دا رافع الراية البيضاء تب …. لا فض فوك …. والمعذرة

============

ويعلق جيلاني على إبداعت الهباني وكرنكا

الهباني و كرنكا جهجهتوا الخلق بالجد
لا عارفين نجاري او نجيـب الـرد
الطيب البفـوح فـوق النوافـذ نـد
هيلكم يا الرجال باب الشعـر بنسـد

==========

ولكن الهباني يقول له نحن تلامذتك في هذا الفن

نحن تلامزتك يا شيخنا منك شِلنا
عادات الكرم حملت نباك زمِلنا
بالسخا والتواضُع والكرم تشمِلنا
اياك رُكزة المسكين وعِزة أصِلنا

==============

ويرد الهباني على كرنكا

قدُر ما تكبـر الأفكـار يحيـره فِكـرك
يا نيل التساب ما نشوفو عاد يوم شُكـرك
شنفته الأُزن وأزكمته الأنوف بى عِطركَ
طامح فوق ندادتك ديمه طالـع زكـرك


تقاسم فى الهموم شايل معاى فى هـواى
وحاس بى خطورة الحسس الدخل أعضاى
أخذ من نومى أتِب أطراهو قبـل الشـاى
بعد دا ان مارجع يـا كرنكـا وا أسفـاى


كل ما امسا يوم طالبيـن رجوعـو وردو
أساهر الليل سُقد حافـظ نجومـو انعـدو
يا جيلانى وين الفـاح بخـورو ونـدو؟
كل ما أغمدن اتـوارا لـى نـور خـدو


مو هيلك تسيب ساحـة الكُمـاج تتنحـا
هيلك تدخـل العركـه ام سلاحـاً قحـه
هيلك تركـب أبحنـك البطبـق الوحـه
وهيلك تخجِل العييـن أم سحابـاً سحـه


بناجى وبطبق المُسدار وأحاكى القُمـرى
لامـن ارجـع ابريـداً مـودر عُمـرى
مالى عليك وساعة الحوبه داخرك دُخرى
وان زله اللسان يا كرنكا تقبـل عُـزرى


نتطابـق علـى الواحـيـه والـواقـوق
ونطلع فوق ضهور ألبلبنا نسـدُر فـوق
ان بـردن بُكـار نفـدابـاً المعـشـوق
وان حـرن نقابـل الجُلـه مـا بنـزوق


نرجع تانى لى النم فيهـو راينـا نفتلـو
نهجم دكة الفـى قلبـى كسـرو وفتلـو
ابعرضين يزيـم ديـرة الحبيـب هفتلـو
هجران الغرام لى قلبـى واحـد وكتلـو

===============

ويعود كرنكا رغم أنه رفع الراية في وقت سابق ، ، بعد أن أثر فيه كلام الهباني

قال الهباني ………………………..


قول لى كرنكا خُت فوق ابحنك قـوم شِـدو
وان ما عاد حبيبـى أشكيهـو وكـل شِـدو


قت لو ……………………………..


مَانِي مُوَكِّلُو وبَراي يا خُوي بَدافِـع عنـك
وصاحِب حقْ يمين بِغْنَـاكْ وأدبـك وفَنْـك
مهما قال محامي الفِـي مَحَاْكمُـوا مَحَنَّـكْ
ما ظنيتـو بيزيـد فـوق نََمِيمَـك وحِنَّـكْ


قانون الغرام بـى بنـودو جـت ظاكَرْتـو
وعَلَّـقْ لبجنكـك والنَّافلـة بَـدري دَفَرْتـو
عِنْ دار القضـاة بَـرَكْ المَرَتَـبْ حَرْتـو
غَفَّلتْ الغَفِيـر بـى الدَّقَعَـة مـا عّبَّرتـو


لقيت القاضي مِتْوَسِّـطْ فَـرَاوْدو الخمسـة
قال لي قضيتك خاسرة آ كرنكا خلي الطَمْسَة
شِنو البِجْبُر اليُـوتْ فـي الـدَلال مِنغَمْسَـة
قٌتْ قانون الغـرام المـادة ميَّـة وخمسـة


يا ناس القضـا أنـا زولـي فـاتَ الحَـدْ
بالصَيِ والهَوِيد يِتْرُسْ يِكُـوسْ فِـي الـرَّدْ
أبعرضين شَكى قال آخوانـا حَيْلِـي انْهَـدْ
شوفو الحل معـاي خَلُوهـا روحـو تَـرُدْ


الفُقَرَا الغُر دُقُونُمْ واهل الخـلاوي يِِجُـرْدوا
والهباني تَائِـه مـا ظِـن مِحَايَـه تْـرُدو
الزول غَبَّ مُو فَارِز الحَيين مـن الاتْعَـدو
ظَنتو خَلاس قِضَى حين قال لي “وَكِلْ شِدُّو”


قَال قاضي الغرام قُبَّـالْ نَقِفْـلَ المَحْضَـر
نَـادُوه المتهـم خَلُّوهـو حـالاً يِحْـضَـر
يوم دَخلتْ عليهـم فَـرْعَ الأرَاكْ الأخضـر
الفَرَاودَه إتْشَقْلَبَتْ وقَاضِي الغرام إسْتَحْضَـر


يَنْفُضْ فَي التُراب قَـام مِـن خَلاهـو يِنِـمْ
يَنْهَـفْ بِالغُنَـا وعُقٌُـبْ الفَـرَاوْدَة تَـتِـمْ
قَال ليا للهباني قولو القاضي قـال لا تْهِـمْ
بِالبُوليِـصْ بِتَرْجَـع وكُـلَّ البِـدٌورو يِتِـمْ

=====================

ويرد عليه الهباني قائلا

همى برد وكـت مسـك القضيـه أبعـاج
ما بقوم فوق هوينـه ولـى المِحـن دراج
بسايس الرايقه بفتـح لـى الصُلـح نفـاج
بنفذ رأيو بشويـش هـادى مـو هـراج


رِكِب بدرى الصُبح حاوى الحِكم فى سدرو
لـواى سلسـل الدفـرن بعرفـن قـدرو
اضوى جبينو نور حافظ المواد لو تـدرو
ما بِرجِع ازاكر القاضـى مـا حضرلـو


اخد استشارتو عِرف الحكم مـاش ويـن
حالى حديثو مـا بعـرف الكـلام الشيـن
مقبول فى الوساطات سيفو ماضى سنيـن
ابوك حلال شِبـك أأ الفنجـرى أبجيبيـن


بارك ربى فيـك جـددت أملـى القـرب
اموت أحيتو يا الفـى الفراسـه مجـرب
نضب النم وشاط كيبورتى مابى اتعـرب
عقبان عادلو املو الفى رجاهـو معـزب


محظوظ قاضى الغرام شاف المردف عاجه
نزل من خدرو واتواضـع ظُبـى الباجـه
ناجيت ليلى جت محبوبتى عاليه أبراجـه
ما بتسمع كواريكى بهمِس بخاف ازعاجـه


شُفتو براك يرُص قدمو وموحلـو ردفـو
وشميت منو عطرو الفاح بيسكـر كرفـو
رقيبتو قزاز كُتُـر طقاقـو خانـق شفـو
صدرو طمح وضامر هافو واجـب خَتَفـو


اصبح منى يا كرنكـا الصُبـر فـى قِلـه
شحتف روحى هجرو البى الغِفـار اتـدلا
ما خليت وجيـه وسطتـه شيـخ الحِلـه
أهديتـو العُمـر قـال ليـه أهديـك فُلـه


نشكر فضلـك أأأأالقدامـى راس الـروس
رايك ديمه راجح وهادى مـك مطمـوس
بتدخل عركة الوعـر الزخيرتـو تكـوس
كليمة القاضى ليك فى سدرى لسه تحـوس


لكـن الحكـم زنديـه عِــن قاضيـنـا
حالو موجـب أقدارنـا وبعـرف الفينـا
حـاول رجـع الفـات بالهجـر قاضينـا
ما بنحمل فراقو الشـوره كيـف أفتينـا

============

ويعود وررووك بعد اقتباس بعض مربعات كرنكا وهباني فيقول

هيئة التنظير العليا للدفاع عن المتهم

لو كان الجمال اصلآ دليل لـي إدانـه !!!
ما كان القمر طول عمرو ضاوي سمانـا
كان من زمن (جاليلو) حبسوهو في زنزانة
وكان ضلام الليل بسـوادو ديمـا معانـا


يا كرنكا وكيلـك دلايلـو جـت تعبانـة
(النسيم) شاهدو الوحيد ما ليـه اي متانـة
ولو قاضي الغرام حكـم الأمـور بأمانـة
علـي بالحـرام قضيتـو تـب خسرانـة

=============

وسرعان ما يرد عليه كرنكا

ياوروروك الجمال بالحيل دليل إجـرام
زَيْ هباني خُوكْ… ما تْظِنُّو كَتْلُو حرام؟
الحكم الصـدر مـا فيـو تانـي كـلام
وطلع أمر القبض بس واقف على الأختام


الأمر الطلع قال في خِسُـوسْ الجَانِـي

“نََعَمِنُّو المُشتكي الهباني ود هبانـي
ثبت أنو مَيِّتْ فَي غَرامـك يِعانـي
مطلوب الرجوع للنافذة ما في تَوَاني”


عوج الشاكي واضح بثبتنو حقائـق
تلفت صحته واصبح منامـو دقائـق
طلق في جسمه نيران المحبة حرائق
لكن المتهم في دلاله تايـه ورايـق

=========

ويأتي جيلاني هذه المرة ولكن بعدة مربعات

يا الهباني جـد قاضـي الغـرام ظـلام
وموضوعك خلاس ما بدورلو اصلو كلام
التاريـخ بقـول جيلانـي كـم انضـام

بي فايل مهيـره الفـي المحاكـم حـام

قبال ما يحـال فايلـك ويبقـي مـزور
وقبـال انعقـاد جلسـة سمـاع تتحـور
يـا الهبانـي قلبـك بالوجـع بتـعـور

الحل الوحيـد قـص الرقـاب بالدكـر

شـد اب جرايـدا فـي الوكـر قـلاع
واب سدر المعاك فـوق الكمـاج بـلاع
المسدار وجنبوا كرنكـا طايلييـن بـاع
وان وقع السما غرضـك بتـم فسـراع

==========

ويرد عليه الهباني

لاحت لى نجوم العوده فـى الشبكـات
وشايف ظعنو سايقو كرنكا فى أبدومات
ان صدق الخبر يا شيخنا شوف نفحات
بكتب فيهو دُر وأنسابو همـى الفـات


ما تتابع المحاكـم وتنتظـر دستـوره
خلك زى كرنكا الجاهم اخـد الشـوره
عارف حجة الحكام طويـل ناظـوره
بتطول قضيتـك وتبقـا كالأسطـوره


ات ما بكلموك يا الحاوى ستيـن فـن
وفى طـق الحنـك والنقـه نبـر ون
بكره يعود حبيبنا والحـروف تنسـن
يروق بالنا وتعود السمحه حَسِِن ظـن


اسمح ليه لو مجـدت قـدرو كرنكـا
مبسوط منو ساكت رايو حـل الشِبكـه
فصيح شِعرو واديب أستاذ يناطق اللِكه
دود كيدا البزيم الشافـو فكـه السِكـه

=====================

ويرد هباني على حديث ورووك بشأن هيئة التنظير للدفاع عن المتهم

أبقا قصادى يا ورررروك وأقيف فى صفى
بتب حفيـان وبـى نـار الفـراق مدفـى
غرامى الفيهو يا وررروك يزيـد ويوفـى
ما بحتاج لو بينـه ونمـه واحـده تكفـى


كرنكا دفر وعارفنـى الرويحـه بسومـه
ما بقبل برا الفـى قلبـى جـاره وسومـه
بدخل لجة الحكـام نجيـض فـى عومـه
حالاً غفل الشاويش وجـاب لـى علومـه


بُكره قريبه يـاوررروك علـى المستنـى
تصبح بُكره تلقـا البـى غرامـو مَاكِنـى
تشوف خبراً اكيد مو خطرفـات وتمنـى
يرجع حِبى ترجـع روحـى يـا مجننـى

========

ويرد ايضا على كرنكا بقوله

تلحقنا وتنجدنا يا اللى أمريكـا بلحـق تـاق
شيتك شفتـو صالـح ولـى النهـم لحـاق
رأى وفراسه مبروك تانـى عالـى أخـلاق
دملت جراح أخوك اللـى الـدرب ساسـاق


كرمك لينـا ديـن شايلنـو فـى الاعنـاق
نحفظ لى الجميـل شايلنـو فـى الاحـداق
يا الفحل المأصـل ولـى الرقـاب عتـاق


وعدو قريب يعود بُكره ان صبح فى رضاهو
أتعبنـا الجميـع اتعـب حروفنـا وراهـو
بكـره نشوفـو ابحرفـاً يضـوى براهـو
هلال العيد بهـل بُكـره الجميـل محياهـو

================

ويعود ووررووك ليرد على كرنكا

قاضيك يـا كرنكـا زول ختّـاف
عقلو فر وطار لحظة طريفو الشاف
قانون الغرام في الأصل إستلطاف
والحكم إن صدر بنقـدم إستئنـاف


رجوع الغزال للنافذة بنشاركك فيهو
ما بي امر بوليص وقاضي عليهـو
بي تيهو ودلالو الشفنا في ماضيهو
ومتين ما إجينا صادي نفرح بيهـو

==========
ويخاطب الهباني بقوله
الهباني خوي واقـف دوام فـي صفـك
وعارفك اصيـل والعـزة لفـوق كتفـك
وما بترضي النسيم في المحاكـم إشبـك
إن كسبت الحكم… بتكسر قليبو في دربك


آخير الصبـر وبتهنـي ليـك البسمـة
نصيحة مجرب خابـر امـور النسمـة
كتـر للدعـا تلقـي الفيهـا القسـمـة
وانساها المحاكم بتجوط عليـك الرسمـة

==========

ويعود كرنكا ليتحدث عن المحكمة

المحكمة شِلْتَها بى خَاتْري ماني المَكْـري
وما بِغْبِانِي رَأي شَغَّلْتـو قلبـي وفِكـري
أشُوفو مَتَوَّكْ الزول وبِالوَحَـاوِحْ مَهْـري
ألحَقو ولا أقْعُد في التِنِي وفي البِكْرِي؟؟؟؟


جَرَّبْتو الحَنَاسَة وجربتو برضـو الهَيْجَـة
وجربتو الحِيَّلْ وجربتـو لِعـبْ السِّيجـة
وَسَّطْنِا النسيم أكَّـان يِجيـبْ لُـو نتيجـة
نبَقْىَ مَمَحَنِينْ ولا نَسَوِي لينـا وَلِيجَـة؟؟؟؟


الهباني مـا كـان دَايِـر محاكـم وُرَبَّـه
يِسَايِسْ فيها مِن قَلبو الحَنَـان كَـمْ كَـبَّ
قلبو حديد صَمِيمْ ساعـة الكُمـاج يِتْعَبَّـا
لكن في الحَسَـسْ* فـاَق النَسيـم الهَبَّـا


الاسْتِعْنافْ بِطُوُلْ وبِقْعٌـد سِنِيُنـو طُـوَالْ
والوكَّلني يا ورورووركنا صَبْرُوا مُحـالْ
الجيلاني السَبَقْ في دَرْبْ المَحاكِـم جَـالْ
سَارَرُو بالحديث وفي شورة ” القلع” كم ْقال


  • “الحَسَسْ” تعني البنوت ……. راجع الراندوك

=============

ويعود شيخ العرب جيلاني مخاطبا الهباني

يا الهباني هووووي اسمع كلام جيلاني
شيخ عربا مسلوب في النوافذ حانـي
أسالني كيف وورورووك بتامنه تاني؟

دا السرق العسل قبال يضوقه لسانـي

ما يقرك كلام “واقف دوام في صفـك”
وبي حلو الكلام في لحظه بقدر يلفـك
دا الهدهد يرك ذي الصديق في كفـك

الجاب ملكة سبا احذر.. بختفه ملفـك

اسال ناس نوافذ من قديـم عرفوهـو
يوم جاب العسل في غرفة الشافوهـو
بالمايك المكهرب كل الخلق سمعوهو

واندفق العسل من ايدي لـي ايديهـو

كيف الشوره يا الهباني من ناس ديـل
الهدهد بطير فـوق الغـرف بالليـل
خرت عسوله ديك قصبة مدالق السيل
وحتى مهيره بي سببه اشتكتني عديل