شعراء الهمباته

الرحيل
مِسَّافِر بيك سلاح فى الغربه دَرَقه وسيف
مَسَافِر بيك نغم دوبَيِّت يعانق فى الخيال والطّيف
مِسِافِر بيك معارك اُمّه سودانيه ما فترت وما بَتْقِيف
مسِافِر بيكى باب فاتح وموّقد نار وكَرْم الضيف
مسِافِر بيك دروباً فى شتا المجهول وحر الصيف
مسِافِر بيك شُرَاع تايهه ودايماً راجيانى فوق القيف
منو الغيرك بساهر بىّ مرابض الليل وثابت لى النضاَل وحليف
منو الادمن مجاعات الظلام صامد وفى وجدانه كرم الريف
منو الضاق الامر شامخ وما تابع دقون الزييف
منو الشاهد بيعه السفاح وما بايع مع منافقين ولسا نضيف
منو اتحمل قوانين الشريعه عذاب مَسَكْ إيمانه دون تحريف
يا ام النصُر صبرِك غلب ورينا شورتك كيف
بعد الحصل راجعين فزع نازل مطر وخريف

مَعايا نحاسِك الرزاز يدق فى قلبى يتحرك
معاي امانه سيف العود مرابض بيه متمسك
معاى فَرس الصمود جامح هنك فى كَرّارّى ما اتلكلك
معاى شيكان واكتوبر متاريس دم لهيب نيرانا ما بنّدك
معاى محمود محمد طه لسع حى حبل شناقه منه انفك
معاى عبدالطيف الماظ وبدر الدين كمان وقرنق معاى المك
انتظرينا يابت الرجال راجعين وقيدك نحن ليه مفك

بِنَرَجعْ ليّك اكيّد مهما اتراكموا النْكْبات
بنرجع ليك بُروّق فُوق نار اُم لهّيب واقدات
بنرجع ليكى لقمة عيّش تكِفْ الجوع وتنسى الفات
بنرجع ليك جداَول موّيه فوق الجوف دوام جاريات
وبالاحضان نقُش الدمعه من خدْك ونقرى الفاتحه للاموات
ونوقد نارك الماتت وابوابك للضيوف فاتحات

عيونك نحن لا نامت ولا غمضت مفتحه للشمش تشرق
متين تدينا اذن الام نجيك فى سيره للجرتق
ندقه نحاسك البنهاب وخيل المك نمر تمرق
حلف بامسيكه شد الريح شعاع من سيفه كان ببرق
تشوفى براكى بعيونك منو البيناتنا بِدَرّق
نهز واقفين وسط نارك وفوق جمرك بنتحرق
نقش دمعاتك النزلت على خديك بتترقرق
من الشايلاه نحن نشيل زياده وزنه مابتفرق
دِقّون جاتك باسم الدين عباياَت إفك عشان تسرق
إماما الهارب السفاح جبان فى الحاره بتجرّق
ديك العده ما معروف بليد لى جهله اتفرق
هرب خلاكى لحواره عشان فى الدم يعوم يغرق

عشان دينك تبعنا الهجره مجبورين
عشان نستر عروض اخوات عشان الصغار جايعين
عشان توبك ومقنع على راسك يكف العين
عشان ديوان يسر ضيفك وحوش الطين
مرقنا بعيد نعافر فى صحارى التيه وما ناسين
بلاداً فى بحورا جليد وفى حر الخليج تايهين
عشان العمله بالدولار تجيب العيش تفكى الدين
جنيهك كان دهب خالص كمان سوهو بس ملين
عذابك هو المعذبنا وبشقاك شقيانين
قلوبنا مع البعد معصوره لسا معاك وانقسمت بقت نصين
نص عايش جوا فيك يسّمع يشوف بالعين
والنص المعانا كمان ليك بيه منتظرين
رياح الشوق تهب كل يوم يمرفى الغربه مشتاقين

حفظناك فى الكتب تاريخ من الاجداد
وصناك بين امم ظهرت قدام وجداد
صدرنك للعجم انتاج قطن وافر وعيش ومواد
وصدرناك للعرب تعليم وجيل رواد
وقدمناك قداحه خير موارد دخرى نامن زاد
زرعناك بى سواعد الريف حقول بى منجل الحصاد
سقيناك من روافد النيل جروف كانت قراب وبعاد
تابعناك بى خلق ما تبعنا فيكى فساد
وشلناك سيف نصرمصقول حديده يحير الحداد
نامن جات دقون ووجوها كالحه سواد
باعوك بالرخيص ما خلوا فيكى مخلص ولا اجواد
يوم لبسوك النار كمان اكراه وفتحوا فيكى زناد
ديل سبب الفتن بى وراها ماَ ننقاد
راجين منك اذن سواعدنا لسا شداد
مهما جار زمن يا راسيه الاوتاد
ما بحكموك البايعوا السفاح باسم الدين وعاسوا فساد

التاريخ مؤرخ والمسك الاصول عارفنه
والفى قلبه سيرتك نحنا ما ناسنه
يا بت قبايل النيل شموخك بالخيول حارسنه
اشبالك خيولن للابد بستنوا
ذات حدين سيوف مسلوله فيها بسنه
اصحاب تار ودم يوم القصاص حافظنوا
فى الغربه ما بنسوك ليكى بحنوا
لى بنوت فريق وكت الشعر كشفنه
فريع البان” رقيص رقبه ومعاها اتنوا
يا نور العين” والحان وردى بيها بغنوا
افراحك حرير جرتق مع السوميت ضريره كسنه
بى حنه الدامر خضاب الكف عليك ناقشنه
نقاره كردفان كمبالا زادت فنة
بى ريش النعام بحر الزراف فارشنه
لى تاجوج محفلة لابسه عاج من سنه
حباب وطن النجوم الما نخيب ظنه

نحن الفوق همومك كل يوم نتذكر
ونحن حزم رماحك قوه ما بتتكسر
يا البيك الحماس ينبوع قلوبنا اتفجر
حبك فى الفؤاد قاعد عظيم ومحكر
ولدك ود دكين سيف البطانه اتنتر
الصنديد ثبت وسط المحاصه وبشر
نهاية الدكر الغايراه راسا اتكسر
خيول المك نمر من شندى جاتك تدفر
وكت دق النحاس انحن ما نتأخر
مهما جار زمن بى وشه فيكى وكشر
يا ام الرجال ما بحكموك العسكر

 

Published by

abdalla asad

Foundry expert at United Nations Development Programme Studied Foundry Engineering at technical universit of warsaw Studied Engineering at Sudan University of Science and Technology Went to Khortaqqat secondry school Lives in Canada

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s