الهباني

 الدهب المجمر وكل غالى نفيس

غلطان البعايرك بيهن انتى واقيس

ركايب الايمو والنت الوسيع لى الفيس

وفا فروضه تب عبدالله ودادريس

&&&

بعدما ما زار حبيبو وفى ضريحو اتبرك

هداك جبرالله فى الروضه ومقامو اتبرك

بلج حملو بى ختم السعاده  ممرك

على جده وهواويرو المكوك اتحرك

&&&

اساطين السياسه وقبة الجمعيه

ما نسنو جلسات ام شعورا حيه

قول لى ابوالعطا الجفلن على المحميه

تركنلى القماح والزاحى والواحيه

&&&

انور قولو نايحات الفروع لسعنى

ومن نومى ولزيز الزاد عقب منعنى

السلبن لحومى وغير طرح جمعنى

بلدى وطب وبخره الحبه ما نفعنى

&&&

غزال العين ودير زايد …مع هزاع

ما بدانن جمال الحزمو…….. البراع

عفيف المنطق اللدن السحى المرناع

قسم نومى يا البرى وملانى اوجاع

&&&

نقزن كور رواين سفلن فوق ريره

خلن لى عشوقن ليى عجاجن وحيره

عضت خنصره وسدلت مسيره مسيره

حركه عجيبه يا مامون بدور تفسيره

&&&

يا ابوالخير معاى الما قديم مو الليله

ناحل جسمى حسرور العيونو كحيله

الفوق جيدو خايلات الفصوص والتيله

هلك اعضاى غرامو وروحى مو راتيله

&&&

يا الشلبى العليك ختم الغرام مختوم

قلل نومى طيف البى الجمال مردوم

الغنا من كريم قالو الرزق مقسوم

ارح يا صاحبى نعبا على البريدو شيوم

&&&

مكتول الغرام جنا وفقد مشهادو

اصبح قوتو فى الدنيا السجار وسهادو

طريفى العنس القبض الهويد ؤوهادو

ما خلالو غير جته وصحابن اهادو

&&&

مقرون حاجبو واكحل مايقو رمشو غزير

فمو الودعه تابر ساق حزامو قصير

عالى كفيلو فارع قامه جسمو حرير

طامح صدرو يا الهندى الشلاقه تطير

&&&

قول لى ابورايد المسك السحابه وعلج

شال ظبى الغفارات الفويطرو مفلج

العصب القبيل بقرب لماها متلج

هسع هاجو فرقاها وقعد اتسلج

&&&

وين البكرم الميه وضعيفنا براشى

وينو العندو هم الغير صبح متلاشى

وينو الفرتق العركه وقدل متفاشى

ابوعمر الصميم الفارس الكباشى

&&&

مى نقاره مى…… زواعه ماها بليده

سبيب الحمحمن فيها وسماح الصيده

صوت البلبل الشادى السجع تغريده

نادره وغاليه يا الجاهورى زولتى فريده

&&&

يا السيف هندى مصقول سيفه ماهو حديد

سماحه على المتوجه فى السماحه بعيد

دهب اولاد تبيد الاصلى مو تقليد

تقارن لونو بى لون البريدو  بزيد

&&&

يا حاج ادم البرق البوج من جيهتو

خلا لسانى زى سلك الربابه نديهتو

النوم الجفل منى وقبض لى تيهتو

مو عايدلى والقلب عودلتو كريهتو

&&&

يا على ودحمدنا الله البصر فى حالو

لاج لا الشرقه والدمع انبهل شلالو

روينت التيسه دور بى معافى شمالو

ما رحمت قليبن خاتا فوق ملالو

&&&

اخخ انا يا الشفيع من وصفك الوصفتو

كلو عليها خايل ………علا ما انصفتو

ابكفلن متل كفل…………. الفلو  الوقفتو

اسرع زيدو ميزان…….. الوصف طففتو

&&&

جابر قولو صبرى الداخرو ساسو اتهدم

سببو العودو ملفوف بى عفافو مهندم

الكفل البرج بى ريش نعامو مردم

قصرن منو بنوت دورو فات اتقدم

&&&

عقب يا خلا ندعو الواحد القهار

اعتق كافت الماتولنا من النار

قريب الله الختمنابو الخميس فى الدار

احشر امو فى زمرة صحابه اخيار

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s