al-nafitha.com

ترايدنت
 


العودة   al-nafitha > ][النافذة الادبية ][ > الشعـــر

« آخـــر الـــمـــشـــاركــــات »
         :: أستديو البث المباشر في رمضان (8) (آخر رد :Elzobir Basha)       :: الكلاكه والزبير باشا (آخر رد :Elzobir Basha)       :: الفاتحة على روح النافذة (آخر رد :gilany)       :: إلإبنه رزان (آخر رد :الدهمشي)       :: فريع الهبهان هديةالفرجوني...للنافذة (آخر رد :gilany)       :: شريط الإهداءات من المتحرك للثابت هنا (آخر رد :Elzobir Basha)       :: من الزمن الجميل (آخر رد :Elzobir Basha)       :: رمضان اول يوم (آخر رد :wadbara)       :: اندسي جاي (آخر رد :Elzobir Basha)       :: شارك معنا في نافذة الفيس بوك (آخر رد :Elzobir Basha)      


الإهداءات
gilany من Vina : العيد مبارك علي الجميع

 
 
أدوات الموضوع تقييم الموضوع انواع عرض الموضوع
قديم 10-20-2007, 11:37 AM   رقم المشاركة : [1]
باسط المكي
Super Member

 الصورة الرمزية باسط المكي
 





باسط المكي is on a distinguished road

افتراضي العسكر ادونا سوطين وفكونا ..محمد الحسن سالم حميد

عـــيوشة

منبوشة .. منبوشة
نبشوها قبالك .. بت حالا زي حالك
ذي كلمة مربوشه
عودها إنبعت حرقان .. زي شتلة معطوشة
عينيها رماشة .. أم لمبة فتاشة
من طاقة جاتا الريح
كتر البكا .. التجريح
خلاها دعموشة
تلوشة .. ولا ضفاف
خيم عليها جفاف
زي صرخة الغرقان فوق موجة بين فيضان
شعراتا منفوشة
وشفع مبارياها .. عيوشة .. عيوشة
الليل هديماتا .. وشمش الله برطوشة
تشرب من الشارع .. وتاكل من الكوشة
عيوشة .. عيوشة
وترقص لهن رقبة ، صقرية ، جابودي ، السامبا .. كاروشة
عيوشة .. جامايكا .. الهورس عيوشة .. اسلولي عيوشة
وعيوشة ما بترقص .. لكنها الدوشة
وتفلت من الشفع
في الفلتة تترتع ..
تدخل على بيتاً .. ستاتو منمدِّي .. ناساً بعرفوها
لكن بعافوها
دايرين غسيل عدي .. شاكرين يا دقلوشة
ويدوها عيشايي بي دمعة مرشوشة
وتنملك الشارع .. خطواتا مربوشة
السوق مع الأطفال .. عيوشة .. عيوشة
الليل هديماتا .. وشمش الله برطوشة
تشرب من الشارع .. وتاكل من الكوشة
عيوشة .. عيوشة
على قدر ما كاست .. عينيها ما لاقت غير مطبقة وبصلة
المطبقة انهردت .. والبصلة مقروشة
ما قلنا مقشوشة
قشوها قبالك .. ديشك يا عيوشة
يا الحاضر الغايب .. في الدنيا ما جايب خبر المدينة الكان
على رغم ما فيها من فاقة من حرمان
مرات اياديها تعطف على الإنسان
بي فكة في قروشا
بي كلمةً طيبة .. بي فضلة في مطعم او برتكانايتاً ضرباني في كوشة
والليلة بانت زي .. بيتاً في آخر الحي .. ناساتو منبوشة
يا جرحنا الهايم .. طول النهار حايم
يلبد إذا ما شاف صحبانو مكشوشة
يضحك إذا الكومر .. قبل على كوبر
ولا المديرية .. ينمطق الفرحة .. بس فرحة مغشوشة
إن تنجا من كشة .. دردير وتلتيلة ..
كيف تنجا من جوعة .. من بردها وليلا
عزت برنداتا واوكارها مطروشة
بيت الله قافلنو
مستشفى غافرنو .. ساحاتو مرشوشة
كم يوم يعز النوم
رغماً عن المشموم .. والدوخة والدوشة
دي مدينة ما هيلك
مافي البيشبهلك .. ما في البناديلك
لافي البخاويلك
غير ناس أحاويلن قطعن أحاويلك
أصحابك الساعتك لا بد يعاينولك ..
صمتاً يجيبولك
باكر تلاقيهن .. في وجبة فوق كوشة
جنب مجرى يحكولك
ودونا لي ضابط .. كالعادة وانكفرن قال وين أوديهن
والعندي ما قادر بالموية أكفيهن
والعسكر أدونا
سوطين وفكونا
كالعادة يا اخونا .. حيكومة مربوشة
دايرين شغل .. مافيش
غير نغسل العربات غير نضرب الاورنيش
عتالة .. جرسونات .. شغلاً ما يوكل عيش
وبالحالة دي الكشة
بلدية والبوليس ... مرات يجيك الديش
ما يقبضوا الباعوض .. ما يقبضوا الضبان .. والما بدور فتيش
الارزقي السمسار .. إشمعنى نحنا وليش
إحنا الحرامين ولا البدسو العيش
الزول يخاف يكفر .. يرجع يقول معليش
شقيش نقع شقيش .. حتى السجن مافيش
مافيش يا عيوشة
من تكبري آهة وآه
وآدم بدور حواه
الطيرة بي عشوشة
الفارة بي جحارة .. الكل بي مأواه
وهنا في إبن آدم تاه
ملجاه أرض الله
لا أوضة لا حوشة
يا أبونا يا الأسود
يا أمنا القرقد
يا داجي وين نرقد
جاك المحل قاسيت .. لامن هجرت البيت
فض المطر صديت ..
أو صددوك غصب
دارك لقيتا حرب
كرت عليك فريت .. كان مافي غير تنفد
بي لونك الأسود .. بي شعرك القرقد
وبي فالك الشامخ زي تاج أبو الهدهد
لامن يطير في الجو .. من ها المدن ينفد
حاشاك من عيب تب
لي شينة ما ختيت .. دغري وعراض إيديك
بس كفها إتعود في الأرض يرمي الحب
ما قنبلة وديناميت
جيت المدن لاقيت
من سيدا ما لاقيت
تحرس عماراتو .. علشان تمسي تبيت
ويتربو زي ما ربيت
كم للعرق شديت
زوغت أمن .. كريت
جاملت جاراتو
وأو تتم ترحل لي سيد خلاف السيد
يتغيروا الأسياد .. لكنو نفس القيد
نفس الربط ذاتو
يا ماشي دون راس خيت
وين كنت لما الناس إنقسموا الواطة
في مدن تجز الراس كان زولو ما طاطا
كت مافي ولا أبيت .. واصبحت مقطوع راس
زي ديل كتير من ناس لا أوضة لا ضل بيت
وفتحنا لاقيناك .. أول ما شالنا الحيل
بالراحة في ذات ليل
يا أبونا خليناك .. خففنا ليك الشيل
تقلت بنا الخرتوم
وفرنا لقمة عيش .. موية ومحل للنوم
سامحنا .. عافينا .. يا أصلنا الحنّان
غيرنا اسامينا شان نحيا باطمئنان
دينق إنقلب عثمان .. هاشم بدل دلدوم
من وين ؟؟
من ام درمان وناس بيتنا منوفين
بس لكنة الرطّان تفضحنا .. بعض الحين
وإن كنا يوم في يوم ماشين بننعوّد على لهجة الخرتوم
في ولاد عرب بالكوم
طالعين سوا ونازلين .. يفرقنا إلا النوم
ما الحالة من بعضا .. مطروش ومطروشة
وأكوان وقد قابل .. في كوشة عيوشة
يا التحكي دون تبكي .. وفي وشو بتعاين
شوف فيهو شن باين .. غير دمعة مقشوشة
قشوها ناس أخوان .. أكوان وعيوشة
بي صبر كم طول
على حال حا يتحول
قصر الزمان يا زول ولا الزمن طوّل
لا بد يتحول
ما فيهو من آلام .. في يوم من الأيام لي دنيا مفروشة
بالعافيي والطعام لي كل فم .. ما دام في غلابة بي ديوشا
وبجاي و بغادي قلة وكتر بوشة
تخمت حكام مندلدلة كروشة
فاوة وتفل لاقّي
ونار الغضب باقّي
تالاها محموشة
جرفت لبقة الليل وانطنبجت دينك لا عينا بي شموشة
الحال حا يتحول .. قصر الزمان يا زول ولا الزمن طول
لابد من فوقة .. ومن تنتهي الدوشة
قولاً قبل قلنا .. وكتين نصر نحيا مافي البكتلنا
قولك يا عيوشة .. يا اب نفس طماعة غاشاك ومغشوشة
الدنيا دنيانا
زرع إيدنا نديانا .. لا صيص لا كدموشة
وماك ماشي جيت غاشي .. ليك خيرها ينسبّل
لا كُتّي شحّادة .. نديك وتتوكل
لا جيتنا دنّاعة .. نمسح لك الجردل
أخرت للساعة وتلبت في حوشة
في حزك المنجل وشوالة مخموشة
ناسي انو مزروبة ..
بي شوق حبايبنا وحارساها كلوبة
وكلوبة بات ووبة .. ويات لوبة بتحوشة
يا النفسو ماهية
شن جبهة متكية
بي عمة كاكية .. وطاقية طربوشة
جنب جبهة دغرية .. العمة مكوية .. فوق راسها ملوية
ترقش بياض نية .. وبالهيبة منقوشة
زي وشم فوق أكوان .. شلخاً في عيوشة
يا جرحنا الطوّل
جاييك زمن طيب .. خيراتو ليك أول
صدقني يا طيب .. يا أرض يا جدول
كارتنو بي معول
والليلي تتجول .. عينيك مدهوشة
من كنت تتسول .. في مدينة ما هيلك ومن كوشة لي كوشة
توقيع باسط المكي
 
باسط المكي غير متواجد حالياً   رد مع اقتباس
 

مواقع النشر (المفضلة)

الكلمات الدلالية (Tags)
لا يوجد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع تقييم هذا الموضوع
تقييم هذا الموضوع:

تعليمات المشاركة
تستطيع إضافة مواضيع جديدة
تستطيع الرد على المواضيع
لا تستطيع إرفاق ملفات
تستطيع تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع


الساعة الآن 10:43 AM.

Powered by vBulletin® Version 3.7.1, Copyright ©2000 - 2014, Jelsoft Enterprises Ltd. TranZ By Almuhajir
Dar Al-Nafitha Canada copy rights 2005

Security byi.s.s.w

 


( نسبة ضغط الصفحة : 15.40 % ــ الحجم قبل الضغط : 73.76 كيلو بايت ــ الحجم بعد الضغط : 62.41 كيلو بايت )